Aivoin, aivoin kalinane kukkiv,
Da müöhä marjat kerritäh.
En kerrin mie mieldä i hajuo skoppie,
A milma miehellä annetah.
Oh, ei omalla rannalla,
Da mužikalla rammalla.
Tüönnettih mivn ruavolla,
Da edähänä ruavokšet,
Oh, korgien koivun taguana.
Aššuin aššuin meččiä müöt',
Doijiin šuvren kiven luoh.
Oh, istuočiin mie kivellä,
Da kačoin kaikkih randaziih.
Ei ni midä ni missä nävü,
Vain lendäv kolme linnust'a.
- Oh, linduzet, tüö linduzet,
Ottakkua milma nellännekši,
Nellä vuotta en ollun tuaton, da muamon koissa.
- Emmä, emmä ota gor'ua viijennekši,
Da gor'a iče doidiv.
Aššuin, aššuin meččiä müöt,
I kačoin kaikkih randaziih.
Ei ni midä ni missä nävü,
Vain lendäv viizi linnust'a.
- Oh, linduzet, linduzet,
Ottakkua milma kuvvennekši,
Kuvži vuotta en ollun
Tuaton muamon koissa.
- Tule, tule gor'a kuvvennekši.
Lenniin, lenniin tuaton-muamon saduh.
Tuaton sadu zelenäne veššelä,
A muamon sadu kuivannun,
Da ünnäh hiän on gorevdun.
- Ei-go gor'a kerrinnün.
Kaččov muamone ikkunašta,
A tuaton sadu veššeläne, zelenäne.
A muamon sadu kuivannun i gorevdun,
- Da ei-go gor'a kerrinnün.
- Kergiin, kergiin muamozeni,
Kergiin, kergiin varazeni.
- Tule, tule gor'a pertih.
- Oh, ei šua, ei šua muamozeni,
Da ei šua, ei šua varazeni,
Gor'a kerran harpuav, toizen langiev.
- Paistua, paistua gor'alla palavast'a.
- Da ei pie, ei pie muamozeni,
Da ei pie, ei pie varazeni.
Oh, gor'a küvnelillä on külläne.
- Paistua, paistua gor'alla gostinčua.
- Ei pie, ei pie muamozeni,
Ei pie, ei pie varazeni,
Da gor'an gostinčua ei priimitä.
Šuatto muamone meččäh šuat
I müöštiäčči hiän kodih päit',
Da kačahti hiän jälllellä.
A gor'a kerran novžov,
A toizen langiev.
Kerran harpuav, toizen langiev.
Tuli gor'a kodih.
- Muamozeni i muatkozeni,
Ota gor'an gostinčua!
- Ei pie, ei pie gor'an gostinčua,
Gor'an gostinčat on muigiet.
- Nadozet, tüö nadozet,
Ottakkua gor'an gostinčua!
- Ei pie, ei pie gor'an gostinčua,
Gor'an gostinčat on riešat.
- Küdüzen, küdüzen,
Ota gor'an gostinčua!
- Ei pie, ei pie gor'an gostinčua,
Da gor'an gostinčat on uvvet.
- Minn'azeni, minna'zeni,
Ota gor'an gostinčua!
- Passibo, passibo minn'azeni,
Passibo, passibo varazeni,
Gor'an gostinčat on magiet.
- Passibo, passibo minn'azeni,
Passibo, passibo varazeni,
Priimiit gor'an gostinčat.
- Passibo, passibo gor'an gostinčoilda,
Gor'an gostinčat on magiet.

Back